2009 年 3 月 3 日 星期二 【晴】
昨晚返 night, 之前落 Bayview 食個叉燒炒蛋套餐, 跟住落 med lib 讀書, 借了一大堆書返 office, 搬到兩個老鼠仔都好累. 點知個 night shift 前所未有咁舒服, 九成時間清兜, 得一個 cat2, SMO 瞓天光, 我還可以睇書.
Night 完睇新聞, 計左一大輪數, 睇下滙豐供唔供股好, 我決定供, 不過要返多幾日 locum 才得. 之後就好安樂咁在 call 房瞓到十二點, 落到巴士站即有 973 去到尖沙咀. 今日醫學會和 MPS 在北京道朗庭酒店請食午飯, 筵開至少二十席, 又係非常豐富的. 我們每年比幾千蚊保護費但乜都無攞過的, 當然要來食返餐增值下. d 野食多到...不過我只食一半, 因為另一半的魚生呀, 魚子醬呀, 其他好多生的野我都唔食的. 全場我最後生, 其他人好似老人宴咁, 即係果d好老的 peri-退休的 GP.
食飽就返屋企瞓埋下半場, 舒服.
2009 年 2 月 27 日 星期五 【晴】
今日請病假, 因為昨天起嘔. 其實今朝都叫無再嘔, 但還是食不到幾多野, 頂住頂住果隻. 所以無謂勉強, 放自己一日病假, 亞公請的.
唔知有無提過, 我這裏請病假是不用醫生紙的, 因為大家同事都知你是否有病同埋是否濫用, 所以大家都很自律, 講個信字.
今晚的食量是平日的一半, 明天應該好返晒了.
2009 年 2 月 20 日 星期五 【晴】
昨晚在call房睡, 今朝起身沖涼食早餐之後就落 med lib 讀書, 讀了幾個鐘就好累了, 食埋個飯就返工.
今晚都唔知算唔算係執左個仔, 不過都怪我學藝未精, 其實係姑娘執, 我 assist 的. G5A1P3 40wk+2 開 10, 個頭差一個手指頭就出, 上唔切, 唯有就地生左佢.
係咪真係要上 ALSO 呢? 今次是第一次在急症室生仔比我幫手, 之前次次都係叫我出去睇住個場. 要爭取多d 機會.
2009 年 2 月 20 日 星期五 【晴】
睇唔通, 個市明明應該向下跌, 但日日開果下跌完之後都有人托返上去, 點解呢? 這些錢邊度來的呢? 又未到期指結算, 經濟數據越來越差, 究竟邊個干預市場, 阻住個市跌?
2009 年 2 月 17 日 星期二 【晴】
今朝去了廣華醫院跟同學 Keith 學碌超聲波. 碌就成日都碌了, 但 d 手勢當然是有人指點下好, 學了好多野, 學了成個 abdomen (除了今日無 appendicitis), DVT, thyroid, 好有用.
都係果句, 如果老細快 d 比我去 rotate 幾個月就好了.
之後去了油麻地食刀削, 好好食喎, 如果在廣華做真好, 不用日日食大家樂.
在此再一次多謝 Keith.
2009 年 2 月 16 日 星期一 【晴】
下午悶悶地, 又不想在家讀書會易訓著, 所以落了新蒲崗圖書館讀書. 果度有個都幾大的自修室, 不過我不是坐自修室, 因為太多人我怕羞. 講笑咋, 其實是我無自修證, 所以坐到兒童果邊靜靜讀. 讀了幾頁, 但都是敵不過睡魔, 同埋果d放左學都喜歡在圖書館裏走來走去精力充沛的小朋友, 最後中途離場了.
落街行行下見到有好耐無見過的砵仔糕賣, 是在蒸籠裏熱騰騰的, 在碗仔裏即刻用竹籤挑出來食果隻, 只是兩元一個. 好好食, 不過食完重左好多, 當然不是講我體重啦. 是個銀包重左, 因為無兩元碎銀, 比張二十元後找返十八元碎銀, 真係令人唔開心.
兜左一大個圈, 最後咪又係返左屋企訓覺.
2009 年 2 月 14 日 星期六 【晴】
剛剛返完 night, 今日 sleeping day. 昨晚個場還可以, 交場時睇到 06:19. 醉酒的幾個, 有個外國人飲醉坐的士唔比錢, 打到個的士司機豬頭咁, 個司機 Bunnett's fracture, 加埋 hyphema, 只是一樣都夠慘了, 還是同時發生在同一個人身上, 實在勁慘. 我第一次自己 diagnose Bunnett's fracture 同埋第一次見真的 hyphema.
打佢果個當然都係我睇埋, 是好大份的外國人, 都有傷, 左5th右4th metacarpal fracture with displacement, 一樣入廠.
其實計計下, 好似整晚收比 ortho 的多過比 medical 的, 想起都覺得唔好意思.

返完個 night, 都唔知去邊好, 就上了大家樂食早餐. 今早食了好稀的柴魚花生粥和糯米雞, 點知個糯米雞入面是臘腸和雞中翼. 我唔食臘腸好多年了, 這一塊當然也不例外; 個糯米雞入面放一塊連要用刀砌一下都唔駛的雞中翼入去, 即係話佢連砌都懶. 我覺得這個糯米雞做得好無誠意.
換埋衫行返西環, 返去睡了幾個鐘就自然醒了, 但其實未睡夠, 又不成功再入睡, 唯有起床. 明知未睡得夠就讀不了書, 困在間屋都唔知做乜好, 星期六圖書館只開到七點不夠我用, 所以執埋包袱落了街回家 (黃大仙). 先去了食碗牛三寶麫, 食完還差少少, 但又唔想叫多碗, 就去了麫包舖買蛋糕, 買了件最大件的. 然後行去等 113 上車慢慢食.
返到屋企才三點幾, 又唔知做乜好, 電腦又有人用緊, 換完件衫又睡過.
睡醒就八點, 剛好食飯, 今餐無乜味道, 幾味餸都是新年款式, 不過好唔好食都係一餐. 食完睇電視的一套戲, 唔知寶貝什麼. 上次睇電視已是好耐好耐之前的事了.
2009 年 2 月 12 日 星期四 【晴】
今朝起身就去了尖東香格里拉酒店, 因為政府請食飯, 應該話生署有書聽兼有飯食, 同我的返工時間夾得天衣無縫, 身為納稅人的我當然要支持下政府.
主題是講禁煙, 都有二百人去聽, 有來自東南西北各地的禁煙負責人來講書, 內容一般啦, 不過睇下其他國家的人點做野都幾得意.
上午的點心是熱騰騰的蝦餃, 磨菇蝦球, 綠茶蛋糕, 生果拼盤, 好好食.
食完點心入去坐陣打多一盹, 就到午餐了. 就我坐果層樓都筵開十六席, 還有另外一層我睇唔到的, 食的是一些擁有好靚的英文名的食物, 但食完就知道原來是纖維燕麥飽, 波菜rocket沙律, 磨菇湯, 免治肉餅加另外一pat唔知甚麼, 牛油 cake 加生果拼盤, 咖啡或茶. 食左前後 90分鐘, 如果以我平時食野的速度, 這些午餐食物 15分鐘就可以消失了, 好彩臨入去前在火車站拿了份頭條和都市日報消磨下時間. 面還放了一盤兩日後好貴的玫瑰花, 好似去飲咁. 不過坐唔滿的, 應該好多人訂左位無來, 浪費了食物.
每人還有一個靚 folder 派.
我納的稅就是花費在這裏! 唉.
2009 年 2 月 11 日 星期三 【晴】
等我由這個月起總結下每個月 toxicology round 學到的野啦, 等無去的人都可以分享下.

今次最得意是講銀行押錢錢箱的氣, 即係噴出來令賊人全身都染了紅色, 銀紙都染了紅色唔用得果d氣. 事緣是有個押款員話唔小心觸及保險針, 跟住就噴到一身都係. 來到急症室, 你點做呢?
果隻氣叫 smoke dye, 由 potassium chlorate [oxidizing agent], lactose monohydrate [reducing agent], zinc sterate 和 dye smoke red No. 9 四樣野做成. 簡單的講就是利用大家中四時都識的 redox reaction 生產出二氧化碳和水蒸氣, 把染料噴出來.
Potassium chlorate 在火柴頭都找得到, 會導致 methaemoglobinemia, 解藥就是大家好熟的 methylene blue, 不過又有人話唔係好得, 之後聽唔明了.

另一樣是冬蟲夏草 (Cordyceps sinensis), 話說香港人好興買冬蟲夏草磨粉煲花旗蔘, 但是有好多藥材舖用比較平的亞香棒蟲草以假亂真, 所以應該說是假冬蟲夏草中毒/亞香棒蟲草中毒.
症狀主要是腸胃 (GI) 和神經 (Neurological), 有 tremor呀, dystonia 呀.
Implication 係, 如果有個人來睇你 GE symptom, 通常都問下佢食過乜呀, 如果佢答你是食了冬蟲夏草湯, 佢其實可能是食了假野後中毒. 如果有渣剩的可以 send 去驗下, 不過都是無解藥的, supportive.

又有講到現在好流行用來戒煙用的 nicotine gum, 有兩個仔食左, 來到問你有無中毒?
原來每粒 nicotine gum 有2-4mg 的 nicotine, 相比起一支萬寶路香煙就是 12mg. 症狀多數人會係 20min 內嘔比你睇, 加埋 nicotine bind 落 cholinergic receptor 果一堆 symptom 啦 (唔該講十個來聽下). Lethal dose 大人是 40-60mg, 仔就 1mg/kg, 越咬得多越吸收得快, 在口都已開始吸收. 不過如果只吞了下肚反而無咁毒, 因為胃裏太酸吸收得唔好, 換句話說, 如果佢食完話你知個肚有d唔舒服, 千祈唔好開 antiacid. 你要做的係如果計過條數真係 overdose, 一個鐘內可洗胃, 多過一個鐘唔該 GI decontamination. 都係無解藥.

今次講住咁多先.
2009 年 2 月 8 日 星期日 【晴】
今天是一年一度的馬拉松, 不過我當然只是跑十公里啦.
今年專登報個遲 d 起跑的, 可以多點, 不用咁急.
半夜行上蒲飛路, 無車又無人, 得了很久都未有小巴, 又同去年一樣有人出現要去維園起跑, 所以一齊坐的士. $20就去到維園了.
今年很暖, 不用再穿冷衫跑, 跑到後半部份還有點熱.
時間都是用了一個小時零一點點, 但這不是重點.
重點是跑完跟中學同學 Michael, Apple 和她同事 Cherry 去鳯城大酒樓飲茶. 今年不再去翠華茶餐廳了, 因為飲茶可以坐耐 d, 同埋可能我們都老了一點吧, 喜歡酒樓. 明年可能只坐在維園睇雀.
我們很好彩, 不用等位就有, 全場爆滿, 點心一疊又一疊, 我們坐了好耐吹了很多水, 亦飲了很多水, 叫到一都是點心, 太好了.
之後返了西環屋企想覺, 但得麻麻, 因為得一個小時, 同埋太曬了. 跟住兩點就返工到現在了.

2009 年 2 月 5 日 星期四 【晴】
今日是 training day, 即是話八點半返工, 放夜晚十二點, 辛苦.
明知咁辛苦, 今朝一早就早點起身, 落左粥舖食碟熱騰騰的牛腸和炒, 好食. 然後只等了一架小巴就有位, 太好了.
上午聽書聽書再聽書, 竟然有一個鐘比 Lucy, 瀟和我三個人在星巴克飲野吹水講人地是非呀喜事呀好趕的事情呀..., 是這間咖啡店開幕以後的第一次幫襯, 好舒服, 不過比好多人行過見到我地坐晒係度. 中午食完飯, 又再聽過書, 聽完未夠鐘開工又食多次下午餐, 到五點半才真正開工, 晚餐反而食不下, 只吃了 trauma audit 剩下來的三文治和午餐肉就搞掂.
不過今日無做過功課呢.
2009 年 2 月 4 日 星期三 【晴】
昨晚法國人返五一, 等如少了個人返工兼多了個人猛咁問你野, 令效率奇低. 加上一開工就先後有好多個要大搞的 cat 1,2, 有人抽完筋發難搞到連坐大堂的警察叔叔都要被叫埋去幫手扎人, 然後差點又生多個仔, intubate 和 ICU 了兩個, 當然又有些突然3分唔醒, d 時間追極都追唔返, 令我返 night 都要兩點幾入去 walking 同佢衝未夠十點的症, SMO duty 的同事都搞到五點才入去, 最後到天光都只能交個 03:59的場比下家, 四點都未到呀, 還再樣衰過早一晚果位同事交比下家的四點半場 (for information, 正常交的場是六點後的登記時間, 叻d的就交個吉兜比下家). 但我都好d, 七點準時走, 昨晚果個搞到朝早八點幾才走得.
唉, 我下個 night 又是法國人 5-1 呀, 點算?
2009 年 2 月 3 日 星期二 【晴】
今晚有朋自遠方來. 講緊的是我返 A 時突然有個亞賴 (王太)打來的電話, 佢話今日在西環替假, 找我晚上食飯, 我當然不會托手肘.
結果我睡到六點就被電話叫醒, 急急沖了個涼, 就落了去合王氏伉儷, 我們三個人去了食上海菜, 吹了好多好多水. 佢份工現在就真是很爽, 五天工作週, 準時收工, 奉旨有飯食, 見的都是正常的小朋友, 不用再見d psy人, 非常安定. 佢知道我有朝一日可能會跳槽, 特意提醒我現在醫管局領取中的房屋津貼已計算在公務員成世人120次房屋津貼之內, 即係話我現在得返 89次, 而兩者銀碼差八倍, 當然是算死草的醫管局少而公務員多, 所以我好蝕, 並在考慮要否 cut 停先. 政府真係豈有此理, 不同機構的錢都計埋一份. 跟住我同佢分析, 換個角度睇, 問題就解決了.
另一樣值得慶幸的是亞賴終於有一點師奶化, 開始不再喜歡靚的奢侈品, 例如房屋手袋和手錶, 亞康康和我都完全感覺到亞賴變好左. 王氏夫婦 '竟然' 同我話佢地考慮緊2月14日要不要給亞賴買花, '竟然' 的原因是對以往我們認識的亞賴來說, 這是無數講的一回事. 我和康康的立場一致 -> 不用! 佢地果個日航酒店的兩日一夜情人節套餐已很足夠, 無謂係果日用五舊水買紮因需求多而導致不夠平日靚的花.
賴, 我同你講, 果日自己主動話唔收花的女仔最教人喜歡. 別以為果日無花會被比下去, 暗地裏康康加了你分數你都唔知.
還要多謝你們的利是, 祝生牛 B 成功.
2009 年 2 月 1 日 星期日 【晴】
這個星期食左好多野, 先是早幾日的荷里活新天地上海菜, 跟住因為聶偉有張信用卡可半價睇戲和食飯, 所以去了又一城睇 a curious case of 什麼 button, 幾好笑, 又食埋八月天的好多好多野.
今日去了維園領取十公里跑的物品, 本來預備午餐去南記食米線, 但行行下見到好多外嫞買野食, 自己又走埋去買埋一份. 我估是印尼的食物, 件件都很新奇, 買了好多好多小食, 一路坐車一路食, 全程都無停過口, 雖然不是好好食. 又買了一大包蕉葉包的食物, 叫食物因為我都唔知佢係乜, 不過人買我又買, 留返晚餐食. 結果原來入面是飯, 叮熱後就食, 辣到噴火, 頂了幾口, 飲了好多水, 最後都是頂唔順, 掉了. 我都覺得好浪費食物, 咁大個人第一次掉去食得的食物, 但無辦法. 最後去返大家樂 canteen 再買飯食, 舒服晒. 由晚飯後到十一點放工前去了兩次所, 開細果隻, 因為飲了太多水去沖淡辣味.
留在辦公室做功課至三點, 今日全日返工都很累.
2009 年 1 月 30 日 星期五 【晴】
Deputy HCE: Despite the high attendance in A&E in past 2 days (about 400), the no. of admission was below the ordinary days. Thanks the hard work of our A&E colleagues in the festival days where others were enjoying. Heartfelt appreciation.
我: 梗係啦, 咁多 URTI, 當然少 admission 啦.

老細: Thank you for the hard work.Despite we have the highest % increase in attendance among all A&E's, we managed to keep our admission low and waiting time at reasonable level. It is the concerted effort of all colleagues.With the increasing complexity of our work, we'll definately feel more stress, but I believe our patients will benefit and our specialty will grow and prosper eventually.Again, wish you all a blessed year of Ox
我: 睇下你叫邊個返工姐, 又出多個人梗係好 d 架
2009 年 1 月 29 日 星期四 【晴】
上午睡覺, 下午去聯合上皮膚科門診, 學到好多野.
不過個 tutor 話, 我左手掌的 melanocytic naevus 要切, 來預防有朝一日變 melanoma, 因為亞洲人多d; 不過佢話睇住先都無壞. 跟住另一個同學除鞋除襪, 展示了佢腳底的另一粒 melanocytic naevus, 一樣要切, 佢果粒大粒 d 要找骨科切.
我在想, 點切好呢? 我自己去小手術室切? 找同事我我切? 還是去東華約個期切兼拿返幾日病假好呢?
2009 年 1 月 28 日 星期三 【晴】
唔掂呀, 唔收利是要逐個逐個解釋一大餐, 一日做好多好次, 又容易得罪人, 好似好唔俾面人地咁.
都係收左佢, 講聲祝你身體健康, 心想事成好過.
2009 年 1 月 27 日 星期二 【晴】
這幾日咁凍, 出街時件衫拉褳拉到上頸, 頸巾包到個口, 條頸梗晒怕入風好凍, 搞到自己成個 ankylosing spondylitis 咁, 要成個身轉去望野. 所以今日突然走了去買了個電暖爐, 把間屋變做避寒中心.
2009 年 1 月 25 日 星期日 【晴】
A N 完要返 P 真是痛苦, 尤其是一個睡到 wryneck 的人. 所以為了抖擻自己的精神, 今朝食了好多野, 食了好多塊曲奇餅同個橙都未夠喉, 因為兩樣都是凍的, 就落街食了熱騰騰的炒麫牛腸和白粥, 食完成個人都暖晒, 然後就去返工了.
今晚不算多病人, 同埋d病人都很願意返屋企.
放工坐車又經過維園, 在外面見到咁多人都已不想入去, 還是返屋企瞓覺吧.

唔記得講, 今朝很冷, 刷牙刷得落力左d, 支牙刷在我口中斷了, 所以我牛年有新牙刷用了.
2009 年 1 月 24 日 星期六 【晴】
本來初一是 reserve, 即是有電話就返工, 無電話收到就全日放假. 但日前老細send了封信:

Dear all,
I wish to alert you that on 26th Jan., the first day of Lunar New Year, there will be a protest demonstration by a group of about 500 muslims at the carpark opposite to Cancer Centre.The protest is targetted at QMH.It arose from the death of a young muslim whose body was subsequently collected by his Godmother 4 months ago. Now the siblings who had long not in contact with the deceased, complained that the hospital allowed the body to be collected by non-relative and not cremated properly according to Muslim's religion.
Our concerns:
1. They might march to A&E to protest and interrupt our normal service.
2. Some protestors might suffer from cold injury.
3. There might be violant outbreak.
What we should do:
1. Minimize the waiting time and keep A&E vacant as far as possible.
2. Prepare to receive protestors who might be injured or suffered from cold injury.
3. If you are on day off, please pay attention to the news, and in case of need, disaster call might be activated. I shall put ICU, CCU and trauma team on alert. Let's hope that it will be a peaceful protest. Wish you all a healthy, blessed year of Ox.

我果日 reserve 呀, 即是話我幾有可能初一都要返埋工. 無野好講.

2009 年 1 月 20 日 星期二 【晴】
維園年宵開了, 下午坐車經過已見到很多人行緊, 不過我還是要努力做我的功課先.
年宵開即是農曆新年又來了. 幾年前開始唔想逗利是, 感到咁大個人還逗利是不好意思, 而且我很不喜歡同人拜年, 無端端爆一大堆四字詞語的恭賀說話實在好假, 講唔出口, 同埋好似討好完人地問人拿錢咁, 很不好受. 我去年完全無同姑娘拜年都有些人唔高興, 已叫定我今年一定要自自動動同佢拜返年, 我很不願意, 到時再算.
其實親戚果面的利是我已無袋落袋好多年, 全部叫屋企幫我循環派返出去, 總之唔好煩我去袋呀,拆呀,記邊個比邊封呀,看銀紙有無靚號碼呀...
新年返工是開心的, 是因為通常少d症, d病人想返屋企唔會 lur 入院, 同埋一大班人返工好過困在家裏.
已經是連續第 n 個初二無得睇煙花了, 因為調了個 O 比同事, 不錯, 令人開心其實自己更開心. 我覺得初二的煙花如果無商業贊助就不要放, 政府比錢咪即係我比錢, 同燒銀紙一樣敗家, 經濟差就是差, 不用粉飾太平做show, 不如拿d錢做點有意義的事吧, 一年放幾次煙花很厭了, 有食滯了的感覺.
看完今晚奧巴馬的就職典禮, 先唔講佢是否做到野, 但肯定佢好吹得, 吹得已是成功的一半, 相反我們的特首就相形見拙了.
2009 年 1 月 12 日 星期一 【晴】
今日老細和 SMO 在茶房講開總部例行檢查 duty 的事, 個計法是每星期 44小時為基數, 扣除一年十幾日公眾假期的平均 (即係每月約一日, 每星期一個多小時), 再減返少少唔知點樣微調, 總之是一些我唔明白的野. 結果就係每週 ~42+小時. 老細擔心的是總部的計法可能有點不同, 令到計出來可能少過指引的 42.1hr 才有一半 call 錢拿的規定, 擔心大家被減人工.
我就多口插了嘴, 轉個角度問老細, '咁係咪唔要果千幾元 call 錢就可以每個月放多兩日假? 我第一個願意.' 老細話: 當然唔係啦. 我灰左.
老細是由錢角度著眼, 我就是從假期的角度著眼.
計我話, 如果要交十幾廿巴仙的稅, 你不如比我放多兩日假好過了, 太不值了.

其實好多野都好蝕, 但管理層不會理你:
-我們平時用來寫 medical report 的時間是無人當我們工作緊的, 即係白做.
-上法庭要用自己時間, 返學 (就算是自己 college 的堂) 都要用自己時間.
-黑雨呀, 八號風球呀...當大家大覺瞓緊, 但我都要返的工作時間, 是無人當我返緊工的. 這些時候姑娘人工有近雙計, 但我們無之餘連打風時的士錢都要自己比. 院車可以話危險唔開, 我就唔可以話危險唔返, 這又點計先?
-現在還嘈緊話醫院外的急救都要做埋, 家下叫 pizza 送外賣咩? 我份約講明是做急症室的野的, 你咁算點先? 同事要背負唔知幾重的器材走幾遠路去唔知邊度做所謂的急救又點計先? 要有埋體能訓練的是否當紀律部隊先? 即係話是否加唔知幾錢人工同埋可以申請紀律部隊宿舍先? 權利和義務要對等的, 要人做多d 野就要比多d 野人.

原來計 call 錢不是計你每月幾多 call, 是計每週平均工作時數.
好似明多d, 又好似唔明多 d.
2009 年 1 月 8 日 星期四 【晴】
自從有兩位同事於一兩個月前升做副顧問後, 佢地就合資格申請辦公室枱上的一部電腦了. 其中一位申請了, 但因為佢本身枱上太雜亂, 根本無地方放置該部新電腦, 結果新電腦就裝了在全辦公室最吉的一張枱上, 即係我果張呀陰公. 當初我選這張枱的時候, 都是因為佢面對牆壁和無電腦, 令我可以在最少外界騷擾下讀書做功課, 點知前日一返工已來不及阻止這悲劇的發生. 多了部電腦會引來很多同事到自己的枱上共用這電腦 (同埋我張枱); 不時帶來食物呀飲品呀等等的衛生問題; 同埋我不能隨心地拋我的衫褲到枱上就開工, 因為會阻住其他人用電腦... 總之 n 個問題啦.
2008 年 12 月 24 日 星期三 【晴】
等我又講下明愛門外有人暈倒事件的處理方法先
公眾和傳媒對同事點做野唔明白我都可以理解, 我最唔妥的是主席胡定旭一句無 ‘common sense’ 的批評, 同埋總裁蘇利民致歉聲明話 ‘急症室收到通知後, 須盡快派遣一隊醫療應變小組到達現場, 為患者進行急救’. 講出這樣說話的人, 你一定未係急症室返過工, 誰不知亞媽係女人? 通街都係醫生巡邏好唔好?
其實同事都很清晰邊度的病人有事要點做, 只是公眾不理解. 你人到急症室的, 分流完有需要的即睇; 你到急症室門口暈倒的, 找人抬你入來, 一樣做分流, 無問題; 院內的, 管事部會想盡辦法送你去急症室; 在街上的, 鞭長莫及, 由救護車幫你, 如果你人未到, 但救護車同事覺得有需要的, 電台通知後我們一早留定位比你, 一到即睇. 就算好似拍戲咁有醫護人員跑十分鐘去到現場, 但無儀器藥物都是救不到人的, 你唯有認命, 等架有完善設備的救護車吧. 今次個病人暈倒的醫院門口距離急症室好遠, 坐車都要幾分鐘. 大家無可能放下一個做到無停手的場, 放下每人手頭所有 cat 1,2,3 (垂危,危胎,緊急) 等緊你去救的病人而跑出醫院外的街上評估一個唔知做乜原因暈低的人? 你不知佢係心臟病,中風,低血糖,肺水浸,休克,飲醉酒…還是另外一百個原因令佢暈低, 你叫同事帶什麼去幫佢呀? 赤手空拳去同一個學過急救的路人甲去其實無乜大分別, 只靠搓住去急症室十搓九輸, 你叫架救護車去起碼都多條氧氣又可以 set 定條 IV, 幫到最多.
如果你話今次連醫院門外的街都要出去幫的話, 下次過一個街口點先, 兩個街口又點先, 搞到條線模糊不清叫人點做野? 行之有效的制度就此毁於一旦. 明知連自己個場都搞唔掂點樣顧埋出面, 同一時間得幾多人返工你知唔知? 得, 你咪好似現在假日的飛行醫生護士咁架架救護車都請個醫生護士囉. 目前人手繼續不加, 市民期望和要求日高, 無奈只有一句辦唔到.
面對住公眾不實際的期望, 做高層的應該做的是解釋點解是這樣做法, 而不是嘩眾取寵的埋怨同事, 我覺得今次可以做得更好的是要放置更清晰的指示牌教人點去急症室, 幫佢打埋 999, 言語上安撫下家人, 長遠點可以鼓勵市民學急救. 不設實際, 附和大眾的建議請不要提, 提出的都令人丟臉. 唔好話我話, 就算今次你派了人去幫手, 該病人的愈後都是不樂觀, 到時又有另外的東西會賴. 賴地硬的文化和輸打贏要的文化充斥整個社會, 此風不可長, 你要義正詞嚴的教育大眾正確的觀念, 而不是屈服在傳媒的淫威下, 這就是高層份糧高我幾十倍的原因. 可惜今次高層未盡本份.
高層是要為同事與公眾溝通和解畫, 人地唔明你點做野你要講到佢明, 可以改善的就去做, 現在搞到市民和員工都非常不滿, 士氣低落. 還是換返個醫生上去管大家吧, 這兩個高層唔掂.
2008 年 12 月 7 日 星期日 【晴】
好耐無出過街, 今日去了電腦節, 真係好多人, 很有氣氛.
很久無逼過人了, 因為次次街上多人的日子我都是返工, 今次是專登來逼的, 好玩.
我的目標就是要買手指, 逼了好耐才埋到去買, 輪到的的時候, 想買的東芝8G ($99) /4G ($49) 手指已賣完, 全日無貨. 唯有買過另一隻牌子的 4G 手指 ($55), 我估應該是好抵的, 因為早兩三個月在 maincamp 的攤位賣 $80 都一樣比人搶購一空.
使錢的人多的是, 很多人都滿載而歸, 應該可以促進香港的經濟. 但是邊個來促進我個經濟呢?
2008 年 11 月 28 日 星期五 【晴】
Day 8
Check out 先, 之後落地牢放 locker, 然後到市內走走, 去到 St.甚麼 cathedral, 我們遇上了一個上海來悉尼讀書的女子, 拍完照之後話要同我們一起行, 所以由五個人變了六個人.
行的地方包括 Federation square, 佢隔離個唔知乜名的公園, 好似巴黎鐵塔樣的藝術中心, 歷史博物館, 食三文治午餐, 坐 city circle 完整一圈, 行唔知什麼名的公園, 買軟雪糕, 總之行左好多好多路, 到下午佢話要走先, 跟住我們五個到麥記坐, 食雪糕, 行埋好多唔識的名店門口, 一路找野食, 行到 Southern station 買定機場巴士票, 行名店 outlet, 再坐返 tram 到唐人街食晚餐, 找了一間食泰國菜的大吃一餐, 用所有硬幣找數, 坐 tram 返去 YHA 取回行李, 沖個涼就去坐機場巴士到機場.
國泰話班機 overbook, 問我們是否願意每人300元改坐第二朝的機, 大家一口拒絕, 因為很累, 歸心似箭. 不過唔係喎, 我一直以為國泰講的300元是港元, 不過返到香港媽話應該是澳元, 同埋換轉係佢就實肯, 拿d錢去賭場玩通宵都唔知幾好.
澳洲8日之旅就此完結了., 扣除用剩而升返的澳元, 全個旅程共用了港元 17000+, 好抵玩.
2008 年 11 月 27 日 星期四 【晴】
Day 7
今日一樣好忙, 食完 YHA 的歐陸早餐後, 大家一齊行錯了路, 去了另一條街坐tram 出greyline 集合地點. 今天的一日遊叫做 Great Ocean Road, 好似是唔知東定西邊的海岸線, 有d渡假勝地和最緊要睇的十二門徒石和 London bridge, 又坐埋直昇機, 又在海灘映相時弄濕了鞋襪, 又食唧唧冰, 又食 fish and chip, 飲羊奶, 做了很多書上寫遊客唔應做的野, 午餐在海邊一間酒店.
黃昏時返回市區, 去 Dockland 睇夜景和食海景西餐晚餐, 坐 tram 返去訓覺, 太累了. 詳情睇相吧.
2008 年 11 月 26 日 星期三 【晴】
Day 6
今日好忙, 四點幾起身, 嘈醒了同我們同房的外國人, 不過一早報了案所以無問題.
我們昨晚已call定了五人通宵的士, 十分鐘就到了朗豪酒店, 一路等集合一路早睏, 終於出發了, 個駕駛員好型仔, 我做男人都這樣講.
佢這門生意都好好揾, 自己加一個助手, 一架貨van拖住一箱工具, 先到一個草地放氣球測試風向, 然後決定起飛地點, 去到起飛地點, 大家幫手 unpack 氣球, 點火打脹個氣球到成形, 共十人走入去個籃, 起飛, 在空中睇日出, 欣賞市內風景, 在籃內開火時的氣温好熱, 覺得自己的頭髮會被燒焦, 好彩無事, 地中海的男士要考慮下才好決定坐不坐熱氣球. 飛行時間約一小時, 另有四五個其他公司的氣球在飛, 不同公司有不同地頭. 降落後大家幫手pack返好個氣球入籃, 然後坐返貨van去朗豪酒店同駕駛員食五星級香賓自助早餐, 好食. 佢話要讀/做三年拿個牌先, 再做多半年, 然後才可以收錢載客. 佢話其實得一半機會是天氣許可飛行, 所以我們都好好彩. 其實佢朝朝九點收工, 做多份都得, 不過人地外國人無咁博盡, 而且一人 2000港元, 載十個就每朝收兩萬蚊, 做乜要做多份工呢, 都使唔晒.
之後我們坐 tram 返YHA沖涼然後睡埋昨晚的下半場. 十二點幾又要出發了, 好忙, 得兩個鐘睡. 今次趕出去 greyline 集合, 去睇企鵝一日遊. 因為有人睇錯了時間, 所以趕到氣咳, 連買麫包的時間都無, 大家就出發了. 個司機好搞笑, 內容唔講了, 不過我都係想佢唔講咁多野, 因為司機一路駕車一路做埋導遊果份要介紹, 又要同你講笑, 還是安全重要點.
去了一個農場睇袋鼠, d 袋鼠日日比人餵n個鐘, 食到唔想食, 見食物就走了. 還有綿羊. 第二站是樹熊保護公園, 只可遠觀, 不可抱抱, 都好, 因為我怕動物的.
再去就是菲臘神仙島睇企鵝, 我們的票去了一個木台, 好清晰的睇到企鵝上水, 在沙灘走, 向山出發, 有上千隻好壯觀. 外國野真是想得周到, 因為玩到好夜, 今晚司機大佬車埋我們返去 YHA.
我想來想去都想不到, 究竟今晚食了什麼呢? 只記得返到去沖完涼, 我們落地下common area 食了澳洲芒果, 和掉了正在發霉的車厘子.
2008 年 11 月 25 日 星期二 【晴】
Day 5
話說講到我們坐greyhound 離開悉尼, 大家先在車上食了火車站快餐店買的晚餐, 跟住都想休息了. 這是通宵車由悉尼去墨爾本, 有中途站停兩次, 換了司機. 在油站旁的快餐店停下時, 嘗試望過漆黑的星空, 星星無想像般多.
第二朝去到墨爾本下車的地方叫做 Southern station, 無論坐火車還是灰兔巴士都是在這裏下車, 我們還跟司機合照呢, 司機叔叔的呎碼是兩個 Dave, 四個 Alex.
其實就在這車站旁有一間 central YHA, 但我們預訂了的是 metro YHA, 失策, 行了數條街才到. 由於仍是早上很早的時間, 還未有得 check in, 唯有到 metro YHA 的地牢儲放 locker 先. 我們到了厠所梳洗了先, 舒服晒. 見還有點時間, 我們到鄰近的 Queen Victoria market 逛逛. 我估這市場應是整個墨爾本小販的唯一集中地了, 其他全個城市都找不到一個小販. 在這市場買了生果和在 food court 食埋野, 我最喜歡個寬條麫夠熱.
行返去成功 check in 後, 大家都要做的就是沖涼, 之後就去了北少少的墨爾本大學逛逛. 人地綠化得好好, 有大草地大樹, 新舊的建築都有. 之後坐遊客的免費 shuttle bus 出市區, 行了少少街, 到 Federation square 的遊客中心問路取地圖, 點知工作人員大都是上了年紀的公公婆婆志願者, 大家都認同佢地好熱心, 但卻是同個城市和時代都脫了節, 甚麼都問唔到. 例如我地問點去 Langham hotel (第二天坐熱氣球的集合地點), 佢打開張地圖叫我地一齊找間酒店出來先... 我地知係邊就唔駛問你啦. 好了, 酒店位置找到了, 問佢有什麼車到, 答案係: taxi......我夠知亞媽係女人啦, 真係...
結果我們上返地面 (個遊客中心在地底), Henry 忍唔住口渴要買野飲, 我們就到隔離的7-11買思樂冰食. 咁大個人第一次食思樂冰, 無手睇地圖, 就跟住大家走了. 澳洲人的特點是好有禮貌的昆你, 我們要找的 greyline 門市明明在前面, 個電訊舖的推銷員總是要指我去後面, 豈有此理. 終於憑住我們自己的方向感找到了 greyline 的門市, 這是我們上網訂了兩個一日遊的公司, 要去換票確認訂位.
完成任務後我們繼續周圍行, 行到好大座圖書館, 我們當然走埋入去睇下. 人地個圖書館好大好靜好有秩序, 總之唔同香港果d 啦. 兜了個圈去埋厠所就出返去了. 我們過對面坐 city circle, 即係免費古老電車, 可以不停地循環市內主要景點, 但坐得兩個站椅都未暖就要下車了, 因為 Alex 話我們到了唔知 St. 乜野cathedral 要落車睇. 這時五點鐘人地教堂剛好要關門, 我們還是格硬照映相.
然後我們在同一條馬路來回過了幾次, 因為我們無人知跟住大家想去邊, 想去下東又想去下西. 最後就決定坐 tram 到河邊繼續行, tram 其實是香港的輕鐵呀. 不過要上車買票, 全車只有一部售票機, 我們坐了幾個站, 但全程都在研究點用架機來買票和分五次買五張票. 買完剛剛要落車, 什麼風景都無睇到. 我們有問人點用架機, 但個人求其話優惠票最平果個啦, 後尾發現原來全個城市的人坐輕鐵都是不買票的, 因為無人查票, 所以果個人唔好意思大庭廣眾叫我們唔好買票就叫我們買個最平的, 2.6元即 13港元幾個站輕鐵, 真貴.
落車後行行下去到 88樓高的大廈, 有名的但唔記得了, 類似什麼 eurora, 總之上了去睇風景, 睇風景還是日間去好, 果次台灣101晚上去都唔知睇左乜. 這裏不用指示牌話你知前面是什麼風景, 索性用一枝枝固定的望遠鏡描準風景比你, 你只要放隻眼埋去就望到這是什麼什麼了, 非常方便. 這一層有個由大廈伸出去的台, 通電後地下玻璃變透明, 你就好似在凌空走路, 但這都幾無聊, 因為個台只有五尺乘五尺般大, 伸了出去又如何呢. 睇到咁上下, 揚的朋友芳婷打電話來了, 她是新嫁到這裏一年的, 今晚做我們的特別嘉賓指導下我們. 好似之前有d野是話打算唔去的, Alex 問完芳婷佢話好之後, 揚就改了口話這是遊客必做的, 轉得好快. 她介紹我們要在河邊食飯, 因為晚上九時正有d柱會噴火, 我們就到了二樓一間望到河景的餐廳食自助餐, 好食. 這餐廳有架可以自己拉掣開的雪糕機比客人拉雪糕, 好玩.
食飽又睇完噴火之後我們就落樓下的 Crown 皇冠賭場入會和玩下. 大家有贏有輸啦, 大小骰寶理論還是應用到, 不錯. Alex 贏了最多賠數, 由5元變了15元.
今晚坐 tram 返去, 我們自此每次坐 tram 都無比過錢了, 成為了墨爾本市民和我們的福利.
這晚無沖涼, 因為明早四點又要起床去坐熱氣球了.
2008 年 11 月 24 日 星期一 【晴】
Day 4
今早的早餐特別安排食返 YHA 旅館售賣的, 然後想去中國城行返超市和乾貨區. 點知, 無開喎, 都不知是什麼原因了, 唯有行返轉頭十點前 checkout 先. Checkout 完行李要租寄存櫃放到我們晚上回來坐車前才取回. 我和 Dave, 揚和 Henry, 各用一個 locker, Alex的野太多了, 什麼手信都買一餐, 唯有佢自己用一個櫃.
開始今天的行程, 前往火車站途中, 路過之前果間手信店, 各人都有收獲, 我買了幾件 T-shirt 和羊毛頸巾. 所以我們又要行返轉頭再放多個 locker 才再出發.
其實今日我們要去的地方叫 Bondi beach, 即係好靚的沙灘, 先要坐地鐵到 Bondi junction 再轉巴士.
去到個沙灘, Dave 先買條沙灘短褲, $60澳元, 好貴呀. 落到沙灘了, d沙好幼呀, 一點都不燙腳, 陽光和煦, 當然又映了很多相. 不過這個南極洋的水好凍呀, 落水企多陣都唔掂, 拖住僵凍的腳行就如南極企鵝一樣. 揚在灘上玩連拍, 弄濕了褲連忙到附近買了條短褲, Henry 真的穿泳褲落水, 又被我們堆沙埋掉, 我們玩了好耐, 上返去沖腳然後在全海灘上最高級的玻璃屋餐廳 Nikki 食午餐, 應該是第四餐對住個海食了, 這餐正呀, 我食了一份完整的袋鼠肉餐.
遊罷 Bondi beach, 我們坐返巴士去 Bondi junction 的購物商場行街, 有人一心要買手信唔知比什麼人, 結果就五個麻甩佬入去百貨公司的化妝品部買 Jurnique, 又問化妝小姐拿贈品, 我當然是做陪伴的角色啦.
之後又行左陣超級市場, 都唔記得有無買到野了, 經過親切的 HSBC 不禁用自己張咭睇下是否能提款, 原來這裏查閱到我帳戶有多少錢, 連查閱都會印埋單出來的. 之後我們在地鐵站外等了一陣, 因為揚忘記把來回票放到哪裏, 好彩都找得返, 我們就坐火車到 Martin Place, 在此火車站打電話給之後坐熱氣球的公司但不成功.
出到站外有 Sydney hospital, 不知是否話在香港 fellow 後到這裏做一年就送埋個澳洲 fellow 比你, 我在佢門口個 A&E 牌映了張相, 但我都不會來做了, 這城市太多蒼蠅, 不能接受. 我好希望我每朝起床後都可以盡情地打一個呵欠, 不用怕吞了蒼蠅落肚. 然後一路行睇埋宏偉的 St Mary's cathedral, Hyde park, 然後趕火車返 YHA 取回行李.
今晚又要買 Hungry jack 的快餐, 因為趕時間, 食唔切飯, 趕返去 YHA 取回行李.
晚上八點, 我們準時坐通宵灰兔巴士離開悉尼, 到墨爾本繼續行程, 悉尼再見了.

2008 年 11 月 23 日 星期日 【晴】
Day 3
一早九點幾就出發了, 今天我們去藍山, 出咖啡果度, 是點靚點靚的風景區. 我們到火車站剛走了一班火車, 便到 Hungry Jack 快餐店食早餐, 我食了一個芝士漢堡, 一個 whopper, 一塊薯餅 (原來叫 hash brown). 食飽飽, 下班車又要開了, 車程兩個多小時, 一路沿途風景優美 (這個是秘密, 因為得我知道的, 佢地四個都睡了).
到站了, 唔記得什麼名, k 字頭的站名, 大家小完便, 買完水後就起行了, 這個站無出閘機的, 因為整來都嘥氣, 這裏靠自律的. 站外有自遊行 package 售賣店, 我們每人 $52澳元買了套票遊藍山, 有好多隻 railway的玩意, 我們全都買了, 除即趕上 explorer 巴士, 去到各站, 先後坐了 Skyway, Railway, Walkway, Cableway, 風景好靚好靚x100. Skyway 是過一個山谷的吊車, 由第9號巴士站吊你到遊客中心, 在遊客中心你可以坐 railway 落山谷, 是一條好直的 rail, 成 70-80度的. 落到山谷底你可以行 walkway, 短的行10分鐘, 長的45分鐘, 沿途睇下以前的人點開鑛. 行到尾坐返懸空的 cableway 吊車上返遊客中心. 在遊客中心終於買到郵票了, 再坐上門外另一架雙層 explorer bus 到朱古力廠, 嘆了杯朱古力雪糕, 行去 echo point, 在近距離看 three sister 石, 再坐最後一班車到 gorden 瀑布, 點知原來瀑布無水的, 行落山去了 Leura 火車站, 又剛走了火車, 行到附近的舖頭食了燒雞一隻, 小食 n 種. 食飽行返火車站, 但發現厠所被鎖上, 所以到隔鄰的旅館借厠所, 澳洲人很喜歡好有禮貌地昆你, 這次佢就話我地知個厠所用唔到, 但我們繼續前去用, 發現正常果個係用唔到, 但隔離傷殘人仕果個是正常可用的. 澳洲人, 信一半好了.
之後行返火車站等火車, 坐了兩個鐘返 central, 周圍的食店很早就收了, 唯有勤力的亞洲人開的越南店才有得食, 我們各叫了檬粉, 點知這個世界有樣野叫做撈檬, 即係凍食無湯檬粉連芽菜, 好似馬食草咁, 好乾....好彩最後屈到佢比碗熱湯我加返熱碗粉.
食完粉仔, 邊夠我們幾個大男人飽呢, 過對面馬路士多買了奶和啫喱返房吹水計數.
2008 年 11 月 22 日 星期六 【晴】
Day 2
今日揚和 Dave 來, 五名團友都齊了. 我們要轉房到六人房. 無錯, 又 book 多左張床.
搬完房後, 時間尚早, 過兩條街外的中國城食早餐, 卻是個正正式式的西式早餐, 好食, 講得出的西式食物都有, 8蚊, 澳洲這裏算是大份, 但我唔夠飽. 食食下的時候揚已打比 Henry 問我們的行蹤, 因為他和 Dave 已到 YHA 但見不到我們三個. 所以食完之後, 礙於時間關係, 連到超級市場和樓下的乾貨市場逛逛都不能, 只到濕貨果面買了車厘子, 士多啤梨, 然後急急腳返去滙合了.
Henry 接了揚的兩個漫遊, 輕嘆: 點解次次都是call 佢不call 我和 Alex, 我們的答案是因為你最可靠.
跟揚和 Dave 滙合後, settle 了, 又出發, 坐 tram 去漁市場. Tram 是上車賣票的, 得一個人賣票, 由車尾賣上來, 坐了四五個站都未到我們, 如果我們未買到票就要下車是否不用買呢?
去到漁市場風和日麗, 肩擦肩, 唔記果句叫肩摩什麼了. 有很多生魚肉塊串 Kebab 賣, 但我望住生的食物, 很懷疑這些真是食得入口的嗎, 生到咁喎, 就算'燒熟'了的我都覺得是生的. 我們逛了一陣, 找了張向海的枱坐下, 買了很多有生有熟的海產大食一餐, 有什麼魚, 龍蝦, 生蠔, 冰凍熟蝦, 魷魚...當然我只食熟的. 是第二餐對住個海食.
之後我們行行下, 好快又到了昨天的 Darling harbour, 因為揚和 Dave 未睇, 再坐多次船去 Circular Quay. 由這裏行過隔離的岩石區, 期間見到人地個遊輪碼頭好大好靚, 香港學下啦. 衝過個市集, 問人點樣去隔離的 Sydney bridge, 因為我們約了三點爬橋. 爬橋之前要上堂, 要簽生死狀, 要實習, 要換衫, 搞左好耐才有得出發. 真係好大好大風, 大過平時香港八號球好多, 一步一驚心, 離地很高, 開頭真的有點後悔, 到行到了橋面心裏才定了下來. 我們一直行呀行, 行到咁上下又要映相喎, 咁大風我都無心情比你映了, 雖然風景很美, 但我覺得欣賞夠了, 快點讓我行返下去吧. 疾勁的風怒打在每人的臉上, 鼻孔裏和耳膜裏, 無孔不入, 我真的很懷疑自己的耳膜是否已爆了.
行在橋上時不時有直昇機飛過, 我在想為何在這樣的猛風下直昇機都不會被吹倒呢.
過了好耐好耐, 終於慢慢可以從另一邊向下走了, 一手緊繫住安全索, 另一手緊扶欄杆, 突然我們發現在橋的高高處有個雀巢, 真是越危險的地方就越安全嗎?
緩緩的向下行, 好不容易才返回地面, 鬆一口氣. 這條橋我不會爬第二次的, 太刺激了.
行完這次橋, 每人獲發一張證書和一張團體硬照作為紀念.
我們繼續旅程, 走回剛才匆匆趕過的岩石區市集, 不過市集早已打烊了. 向前行, 見順路就走上附近的天文台, 天文台位於小山崗上, 可回頭遠眺剛才的悉尼大橋, 又有小涼亭可供取景拍照, 大家又映了很多相. 差點忘記講我們在上天文台時剛好見到彩虹, 拍下了這美麗的一刻.
從天文台離開時已近薄暮, 我們繼續向地標悉尼歌劇院進發, 途中太肚餓, 在 Circular Quay 的小店買了 donut 食, 味道就像中間穿洞的凍沙翁. 去到歌劇院時已天黑, 外圍有人綵排表演, 我們得從下面進入. 我和 Henry 都摸了歌劇院一下, 已很滿足了.
入黑已久, 我們還未吃晚餐, 順住原路走去 Circular Quay,